الشعر الشايقي

أهلاً بــــــــيكم
في
بوست
الشعر الشايقي

عاوزين نجمع في البوست دة أكبر قدر من كلمات الأشعار الشايقية

ووروني ابداعاتكم ومشاركاتكم في البوست الشايقي

بلادي أنا

بلادي أنا بلاد ناسا مواريثم
في أول شي ..كتاب الله
وحصان مسروج، وسيف مسنون حداه درع
كتاتيبم تسرج الليل مع الحيران
وشيخا في الخلاوي ورع
وكم نخلات تهبهب في جروفا الساق
وبقرة حلوبة تتضرّع وليها ضرع
بلادي أنا
تشيل الناس
كل الناس وساع بالحيل وليلا يسع
وتتدفق مياه النيل على الوديان
بياض الفضة في وهج الهجير بيشع
بلادي سهول ، بلادي حقول بلادي الجنة للعاشوها
ولي البرّة بيها سمع
بلادي بلد ناساً تكرم الضيف
وحتى الطير يجيها جعان ومن أطراف تكيها شبع
بلادي بلد الصفقة والطنبور وجاراتن تنق بالليل
وبنوتن تحاكي الخيل
يشابن زي جدي الريل
بلادي أمان ، بلادي حنان وناسا حُنان
يكفكفوا دمعة المفجوع
ويبدّوا الغير على زاتم
يقسموا اللقمة بيناتم
ويدّوا الزاد حتي ان كان مصيرم جوع
يحبّوا الجار
يموتوا عشان حقوق الجار
يضوقوا النار عشان فد دمعة
وكيف الحال لو شافوها سايلة دموع!
ديل أهلي .. واللــــــــــه ديل أهلي
البقيف في الدار في نص الدار
وأقول لي الدنيا. كل الدنيا ديل أهلي
عرب ممزوجة بي دم الزنوج الحارّة
ديل أهلي .. ديل قبيلتي لمّن أدور أفصل للبدور فصلي
ديل فصلي
أقول بعضي
ألاقيهم تسرّبوا في مسارب الروح
بقوا كولي
ألاقي قلبي والإحساس
وسافر في بحار شوقم زمــــان عقلي
أنا محل قبّلت ألقاهم معاي ، معاي زي ضليّ
أنا لو ما جيت من زي ديلا وا أسافاي ، وا مأساتي وا زّلي
تصوّر كيف يكون الحال لو ما كنت سودان...
وأهل الحارّة ما أهلي

ليه كل الدروب
للشاعر الفاتح ابراهيم بشير
غناء الرائع جعفر السقيد

يا قلبي الحزين وين تمشي ليه كل الدروب مقفولة
كيفن زول يصل للجامعة يرجع تاني لي سنة أولى
ياما كتار حليلهم ضاعوا في زحمة دروب مجهولا
يزرعو في النوايا الطيبة كان ثمرة ضياع محصولا
الواحد يريد النجمة ما بيقبل يشوفو افولا
تلقى وسط ظروفو يشابي عشمان انو بكرة يطولا
مسكين كان يخادع نفسو بي سحب الخريف وهطولا
متعشم يقول المسرة يوم باكر يدقو طبولا
مسكين ياحليلو اتناسى نكبات الزمان وفصولا
واتناسى انو نحن غلابا احلامنا العراض مطبولا
من زمن القراية شراي ما بشوف غير سيوف مسلولا
كل ما اقول وصل لي مرسى القى احزاني شادى خيولا
قاسي الزي يقلى الداريو نقاي يعرف المصقولا
اول ما يقول ديك لي كل خلق الله بكرة يجولا
عايش فد سؤال جواي ليه لحظات فرحنا عجولا
وايام الحزن تندب زي السلحافية مهولا
اختلطت على ايامي قدامي الهموم مسدولا
ممشكلتي العلي ومالبي ما هو مرض دوا وكبسولا
اه اه اه اه اه اه اه
اه من دنيتي واقدارا اه من جحيما وهولا
شينا الزي بلقى الدايرو منو الدمعة ما مقبولا
لكن يا رفاق بالدغري كلمات بي صراحة بقولا
انا كان جنيت او ودرت تبقى ظروفي هي المسئول

ياااااا سلااااام يازهرة عقري على البوست المبدع ،،،،

واكثر من مبدع الطفلة التي تحمل بين يديهااا آلة " الطنبور " وفي وسطها منقوشة كلمة " القرير "

لكي كل الود

بت البلد
أداء محمد جباره

وبلا خبر
طق الخبر مالي البلد
قالوا العريس قام بالأحد
الحلي جاطت والحريم يتهامسن
جاي الولد
كوم من بنات للبير ورد
يتحدثن جاي الولد
يا بختها وا شوقنا
نحنا اللينا جمر الشوق وقد
كل الحديث الليلي فوق بت البلد
لامن خلاص الليل دخل
آخر شعاع من الشمس روّح نزل
ضو القميره جا من بعيد بهر قدل
دافر ظلام الحلي قداموا وصل
ناس البلد النام رقد
والماسك السبحه وعبد
مشغول هو
بخبر العريس القالوا قام يوم الأحد
وهناك بعيد بي غادي في آخر الديار
راكوبة ضلها احر من حر النهار
كوم من بروش وجريد تمر عيدان صغار
ودلوق هدوم موروثة من زمن الكبار
وتلات عناقريبا صغار
كرابة متقطع نزل
والنوم من البيفوقا روح تب جفل
راقد هناك كوم من ضياع
مركب مسافري بلا شراع
احلام مسافري بلا وداع
ودموع ضياع تنجارى
من غير انقطاع
احرف أنين ما خطتن ايد بي يراع
وليلا نجومو يودعنو
خلاص مسافرات هن سراع
بت البلد عبراتا سدت في الحلق
تبكي وتنوح تشرب دموعا وتنشرق
لامن حسيس نقارة جاها من الشرق
قامت مع الليل صنقرت
وبكت بكت شالت طريحتا
للدميعات كفكفت
فجأة سنين الفاتو جن
وايام زمان إتلملمن
واتذكرت كانت تقوم فجر الصباح
لمن يقوم اهل الصلاح
ابوها شايل السبحي صاح
ياشافعه سوي الشاي سريع
شدي الملاح
شيلي المناجل وامشي قدامي الجرف
اتذكرت كانت تسبقو تمشي تنزل بي تحت
تمسك سبيط التمرة بي ايدا وتحت
تقعد تحش اللوبي للكاويق تقش
تصل البحر والموج يداعبا فوق هدوما ينط يرش
بعدين تشيل القش تفوت
واليوم يفوت
وتفوت سنين وتمر سنين
يكبر عمير بت البلد
يكبر معاهو كمان حنين
في يوم صباحو صباح هنا
واحة عبير نغمة غنا
ريحة لبيني مقننة
مر الجنى وسلم علي بت البلد
زي عادتو سلم وابتعد
تابعاهو عين بت البلد
بت البلد سمعت ضريبات القلب
يا الله مالو ده القلب
بعد الثبات كبفن خرب
بت البلد عرفت تحب
واليوم داك بت البلد ما جاها نوم
مادام خيال ود البلد يمشي ويحوم
بين الخيال شافت وجيهو الهاش وباش
شافت عيونو الفيها فيض احلاما عاش
شافت سحاب الريدة فوق واديها راش
بت البلد تاهت مع الشوق الما عاد ينكتم
والصوره ها دي في قليبا بتترسم
إسمو العلي نونة خديدا صبح وسم
تاهت مشت سايقاها دقات الدليب
لي دار حبيبه منى القليب
لي قعده عصراويه فوق العنقريب
للونسي والخاطر يطيب
لي مسكه في إيد الحبيب
الوقفه قدام الجنات
القرمصيص وغنى البنات
يالله وين تلقى الثبات
والصفقه من تال الولاد
ما بتسمعا وجاياها من آخر بلاد
اتذكرت كبف حاج محمد والدا
حالف يمين ود البلد ما ياخدا
لو كان ركع قداما صلى ويعبدا
أتذكرت كيف حاج محمد والدا
قال ليها ما عندك أدب
تعبان سنين فوقك تعب
واديكي لي زولاً كعب
تربال وعيشتو عدم عدم
لو قاري لو ماسك قلم
تاخديه تندمي صح ندم
يشقيكي يوريكي الالم
واتذكرت كيف حاج محمد والدا
وصف العريس الجاي بي قطر الاحد
كتر محاسنو وعددا
راجل موظف عندو مال
يأويكي في بيت الحلا ل
تبقيلوا لي امو العيال
واتذكرت لامن ابت
قول حاج محمد والدا
كيف نهرا وحالف يمين بيودرا
لو مارضت بالجاي بي قطر الأحد
إتذكرت كيف الحبيب ود البلد
في الغربه روّح وإبتعد
وبكت بكت بت البلد
لما الخبر زاع في البلد
إنو العريس قام بالأحد
الحلي جاطت والحريم يتهامسن
جاي الولد
كوم من بنات للبير ورد
يتحدثن جاي الولد
يا بختها وا شوقنا
نحنا اللينا جمر الشوق وقد
لكنهن ما عرفن الشوق كيف وقد
وما عرفن انو هي شوقا تب ماليهو حد
مو ليس للعريس ليهو الحبيب ود البلد
ده الراح وفي زحمة ضياع هو ما اتوجد
يا حليلك انت يا بت البلد
ويا حليلك انت يا بت البلد

كلمات أغنية أم الحسن رائعة الشاعر خالد شقورى التي تغنى بها الفنان محمد النصري , هذه الأغنية جسدت تفاصيل الحياة الريفية بكل معطياتها في بلادنا الحبيبة فالأغنية كلماتها قوية و جميلة جداً تحمل معاني جمالية غائرة في الوجدان تستهوي من يتابعها وكأنه عائش بداخلها

***********

وقفت بعد حلبت لبينة الشاي تكورك يا الحسن
يا ام الحسن وينو الحسن
ولمن صفت رغوة شخيبات اللبن في حلتا المبنية من طبق السكن
واقفه في حوش البهايم ولسع تكورك يا الحسن
وتلاوي في الحمل العنيد
جاها حساً من بعيد مارق من القاطوع ورا
قال ليها خير يا الحاجه خير
قالتلو خير تعال لي جاي دايراك تعنون لي جواب يا الراسي لولدي الخدير
لا تبقي زي شافع السرير يقول لي زين آيمة زين وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت
لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
العشى غنمو من الدرب وسرقت ندي وشو الهجير
سوتلو شاياً بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضل لي بس منو اليقين
وانت طوّل في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولداً عندو طين
العلاج لا تنسي رسلو لي دحين
العوينات يا جناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين انا كت برسلا ليك
في لوري الخزين

باكر بجيك قاطع مسافات العشم
شايل معاي هوى العيون
آمالي في أجمل نغم
باكر بجيك قاطع مسافات العشم
بجيك من سكـــة القلب العشق ذاتك سنين
بجيك من صفحة الماضي الكان قاسي وضنين
خايف يكون زيف المدن غير أصالتك والحنين
جايك من ليل العـذاب ارجيني بالصبح المبين
فُتيني للليل الطــويل يرميني في حضن الآلم
سبتيني بين شبح الظنون وأحزان بتنبع من وهم
ارجيني فوق أرض الصبر جايك من زمناً سجم
لا فيهو للأفــراح طريق ولا فيهو للأيام طعم
باكر بجيك بي لعنة الريد المـــــلك قلبي الجريح
بي حال بيغني عن السؤال ما بوصفو الخاطر الفصيح
خايف يقصر بي العمــــر تحملني من الدنيا ريح
لو كان مُقدر إني اروح سوي لي في روحك ضريح

سافرتي مـــا خليتي خيط ابراه للمرسى الجديد
سافرتي مـــا خليتي لي غير ذكرة الزمن البعيد
علمتي روحي الإنشراح علمتي قلبي يحــب شديد
فجاءة اختفيتي من الدروب وأخفيتي كل زمني السعيد

لكني لي أحســـاس يسوق خطواتي لأجمل عيون
باكر بتلقي خطاي معــاك تتمشى ما بين الغصون
ما تقولي لي وصلت كيف مــن دل قلبك يا حنون
أنا قلبي أصبح ليك مكان يا الناسية إني انا ليك كون

باكر بنكشف الضباب القـــاك في فرح الشباب
تقشي في دمع الفـــراق وتزيلي في أثر العذاب
بكرة المسافـات تجتمع وتلم قلوب يوم عيدها آب
ويعود شباب الفي هواك يا حلوة بي أحزانو شاب

الطمبور صديقنا وعزنا وملجانا
وكتين السنين تفتح بوابة أحزانا
مما قمنا نسمع فيهو لا ملينا لا ملانا..

جد فكرة حلوة
تقبلى مرورى

يسوقنى الشوق
كلمات :أحمد سليمان طه

يسوقنى الشوق واجيكم مانى زاير
اريت رزقا يغرب سيدو طاير

اجيكم والحنين كاسحنى سيلو
يلاقيكم قليبى يبل غليلو
يزيل حزن السنين الهد حيلو
سنين محسوبه من غيركم خساير

اضوق طعم الحياة الطولته فاقدو
واحس فرح الصغير الضمه والدو
كبيرنا على صغيرنا الا قى اقالدو
واجى البيت زى عريس جايبنو ساير

اشوف الحلى وانعم بى لقاها
وازور ود زينب الحارس حماها
واقيف وسط الجروف وانشق شذاها
مهبهب دابو فيها اللوبى ناير

سنين ليمتنا فوق القوز نعيده
زمن كان العمير افراح وريده
يرن طنبوري للافراح يزيده
ويبوح بى حبو لى ست الضفائر

صو رة الطفلة حلووووووووووووووووووووة

albino

دمتى

شكــــــــوى
عبدالقيوم الشريف

أنا داير الوم فيك الضمير الفى دُناك اتلاشي غاب
يا يابا تقسي حرام عليك بتك ربيعها يضيع سراب
انا لومى دار اشكيك لى أهلك وقرايبك والصحاب
داير افض اسرارى واكشف للنقاب
جيت دار أصوغ مأساتي في أجمل خطاب
يروى الدليب أناتى واسمعها فى الرباب
ورينى بتك آيه جنت غير هم معلق فى الرقاب
وبي سببك انت عشان أبوى ربيتلى جنحين من عذاب
قفلت ابواب العلم قدامى ما خليتلى باب
بدلت آمالى العراض بى حسرة دايمه وإكتئاب
يا حليلى أنا المشتاقه لى دقة الجرس للحصة لى فتح الكتاب
يا حليلى أنا المشتاقه تشغل بالى مسألة فى الحساب
مشتاقة لى قومت الصباح البدرى مابرضى الغياب
مشتاقة لى لمة مذاكرة بين زميلاتى البعيدات والقراب
برهنت صاحب المال صبح فى زمنا بين الناس مهاب
وبي مالو يحكم للعقول والطالبو من غير شك مجاب
قول لى اغراك المِلك يا يابا ولا الإغتراب
ولا الحلاوة الفى اللسان الفيها كأس السم مذاب
يا يابا ضيعت الأبوه البيها خاطر الأسرة طاب
ومن غير تشورنى بلا رضاى عجلت بى كتب الكتاب
غشاك بُلال المطر ينزل عليك بدون سحاب
لكنوا مابيروى العطش للظآمى لا بيروى اليباب
مالك تبيعنى انا دون تمن ظنك تراهو عليك خاب
وتجبرنى انت على الغلط وترفضلى لما يجى الصواب
خليتنى زى ظبية سلم فى غابه تفترسه الذئاب
أغراك سماحة الصورة ولا ملى الجراب
كان قلت قاصد الفقره ديل ساكت قباب
مالك على تحرمنى من زولاً قليبى انا ليهو حاب
وتجبرنى انت على الغلط وترفضلى لما يجى الصواب
أنا عشقى فى تربال يسرسر عرقوا يسقيبوا التراب
عيشتو البسيطة بلا كلف بى قلبو يتحدى الصعاب
أرضاني للخاتاهو منية ودايره لى يكون حجاب
ويحمينى من غدر الزمان الليهو ماك عامل حساب
بسعد معاهو أنا فى ديار احلامها فى مدن الضباب
وبى ونسى فوق العنقريب والنسمه جاى هواها هاب
احسن لى من موتى البطيئ بيناتو عمرى شقى وعذاب
ترحل مصيبتى على العلى وانا مؤمنة والمؤمن مصاب

مـــــــبروك الجـــديد
عبدالقيوم الشريف

مبروك الجديد يا ناسي مبروك الجديد
لميت رفيق دربك خلاص خليتني لى الآلآم وحيد
أنا باكي فوق نار الجحيم بتقلي وانت تعيش سعيد
لبست وشاحات بالحزن دنياي - دنياك انت عيد
رغم إنى عارفو بكاى أبداً ما بيفيد
شن حيلتي تانى بلاهو يا قاسى وعنيد
بالله ما فكرت يوم فى البينا في الحب الوئيد
وكيف حال قليب مريودك الغدرو المريد
بالله ما طاف بخيالك مرة عين جفت الغميض
جارت عواطفك وبعتو بى تمناً زهيد
يا السارقة مخزون قلبى سيبتى بلا رصيد
كذب القلب لو نيتو من بعدك يريد
حبك صبح دمع الفراق حراقه داعبت الخديد
وإن جاره سالت من مقل واديها كان قبلك جليد
أوعك تقول لى الحصل بيناتنا ما لى فيهو إيد
كذابه يا لوحة سماح مرسومة في بالى الشريد
وآ ضيعة القلب الزرع آمالو وآ وجعو الشديد
ذبلت زهور ساقيها من دم الوريد
صح قبلى قيس كان تاه وطاش ضرب الهويد
عنتر عشان ريد عبلة كم كسر حديد
الليلة شبعان فى الألم قبالى ود عبدالحميد
فوق دربو انا الفاقد الرشد كيفن يسمونى الرشيد
مبروك عليك بيت الحلال إن شاء الله والعيش الرغيد
مبروك عليك سعداً شدت قمريتو غازلت الجريد
مبروك عليك حروف نغم منظومة في أبيات قصيد
مبروك عليك بيتاً تبكرى فيهو قبل البت وليد
انسيهو زولاً كان معاك حصادو مليان ساقو قيد
كنتى الأمل لكن بقيتى سراب بعيد
يا حليل قليبو الباترو سيف ابن الوليد
شقيان يموت بى شقاهو والغير يستفيد

ضــــــــــــل الغيمــــــــــــه
محمـــــــــد جـــــــــباره
Sad

ضل الغيمه غش قليبي قال ينجمّ خت رحالو
فات خلاهو للكان ظنو في عز الهجير يرتالو
عاد وريني ليه يا غيمه ماك عارفي السفر وأحوالو
ولا قليبي تحتك حالفي ما يطيبلو المقيل يحلالو
ضلك من بعيد يا غيمه كان دايماً بيتمارالو
جافل منو لكن برضو كان عاقد عليه آمالو
جاييك من بعيد يا غيمه قاصدك داير يريح بالو
والله لحظات بس يعيشهن هاني تحتك زي عُمر تبقالو
فاكرك والهجير يا غيمه صاليهو مبشتن حالو
ولا بي تحنان تحضني عليكِ تمسحي منو دمعات سالو
إنتِ لو كان ليكِ قلب يا غيمه عاشقك فات رحلبو شالو
ولا كان واديك دمعك رشّ كترت عربو في حلالو
مادام فُتي آه يا غيمه قصدو الدايرو ما تمالو
ولا شن الحارسو باقي وراكِ مادام غرزو تب ما نالو
بالليل والنهار يا غيمه ناوي يقوم علي ترحالو
وحده خلاص يواصل تاني مشواراً كتير يهوالو
قوليلو الوداع يا غيمه لو كان في الوداع يلقالو
ولا حبة زاد يشيلا معاهو في سفرو ليالي الطالو
داير يوصيكِ هاك يا غيمه لي زولاً قبيل غنالو
ولا تمشيلو توصفي ليهو كيف جمر الغرام سوالو
كيفن بُعدو آه يا غيمه تب في الدنيا ما خلالو
ولا غير جرحاً يزيد إيلامو كل ما صحبو قالوا وقالوا
غير بيت من قصيد يا غيمه يفرِح حتى لي عُزالو
ولا مهما سو فوقو وجابو زادولو الملامه وكالو
غير طيفو الحبيب يا غيمه في دنيا العذاب هلالو
إتذكر زمانو الولى رقّ قليبو تب حنالو
غير قيداً خلاص يا غيمه معقود وإنعدم حلالو
والله رغم البيهو قولي ليهو ما فارقت لحظه خيالو

شايلِك حِسيس قلبى البدق إيقاع حياتى على وتر
يعزف مع الدم مشتهيك زى لهفة الصي للمطر
راجيك تبل الشوق تجى فى موسم الغُنا والمطر
يخضر جفاف دنيانا ريد يطرد ضُلمتنا القمر

عافي منك
علاء الدين عبدالرحيم
عبدالرحيم ارقى
عـــافــيـــة مــنــك وراضــيــة عنــك سـو رضايـا
ومـــا بـيــخــــيــــب الـرضــا والـدتــو يـا جــنـايـا
أنت مـن يـا دوب صـغــيــر مـن زمان دايماً مـعايا
أنــت ديـمـه أمـامـي سـايــر مـا بخـليـك بـي قـفايـا
ما بتغيب من عيني لحـظـة ولا حصـل سبتك ورايا
لا من الله يشيـل أمانتوا أنا بـبقي خاصاك بالرعـاية
ليَ يــرعــاك الـبـيــرعـي لـيَ بـيــك يبـــرد حشايـا
أصــلـك أنــت هـديـه مـنـو والله بـيـك أجزل عطايا
جيـتــنـي واحـد مالـي تــانى رحمـه في آخر صبايا
قـبــل مــا أفــقـد قــدرتـي وقـبــل مـا تنـهـار قـوايـا
جيـتـنـي ذي بـدر منـور وفجـأة طلـيــت فـي سمـايا
انـت لــمـا خـلاص كـبـرتـا دار تسيبني أعيش برايا
دار تفـارقـني وتسـافـر والحـزن يصـبح جـزايا كيـف يهـون لك تحـزن أمك شان تحقق ليك غاية
كان مسـافر شـان عـلاجي بلقي في شوفـتك دوايـا وكان عشـان تسقـينا نهلك نحن بي حنك روايا
كان عشـان كـرعيـنا راحـل نحـن بي بعـدك حفايا كان مهاجر شان تعرس خير أبوك مالي التكايا
خيرو وافر أبوك يحمدوا مراحو مليان بالسعايا وبالقروش الجيب مجكن ولسه برضو الجايا جايا
برضـي منـك مـا بقـصـر بحـفـر أديـك المعـايا كان ده كلـو كمـان شُـويّ بتلقـي في دهـبي الكفايا
أصـلـي مـن سـويـتـو نـاذرا إبـقـي لـي أيـام قـسـايـا خـاتـا للـزمـن البعـانـد لي سعـادتك يا عشـايا
أنـت مـن شبـيـت صغـير راسي ما بتحتاج وصايا ما حصل خيبتا ظني ولا فشل فيك زين غنـايا
لا تسـيـب أمــك تـهـاجــر يـمـه محـتـــاجــي الحـمايا
لا تسـيـبـني وراك تـرحـل إنـت يـاك ضُـلـي وضرايا
أنـت فـوق الـحـوبــة مـقـنــع إنـت للـمـكشـوف غطايا
دايري مـنـك تـبــقـي جنـبي . جنبي في فـرحي وبلايا
دايـري كـان قحـيـت اتـبـنـك ارفـع اقـســمـلـك غـتـايا
أنت سـاعـة تـبـقي جنـبـي تـبـقـي ضُـلـي وتـوب قفايا
ومـا بخــاف ظـلـم الـلــيـالي وأنـت يــاك عـكاز عمايا
دايـري أقـضـي عـمـيـري جنـبـك أصـلو قارب للنهايا
خـايـفـي كـان ســافرتـا ترجع تلقي فـاضي البيت بلايا
حـيـنــا مـا بتـنـفـع قـروشـك وما تجـيــب لك أم سـوايا
مـاني عــارفـي سـبــب رحـيلك يـا وليدي شنو الحكاية
إلا تبـقي بـــراك شــايـف فـي فــــراق الــوالــدة غـايـه
ما بعاتبك وما بلومك لو رحلت بلـقي في الأمثال عذايا
عـلـي حـجــر دايـمـاً قليـبـك وقليـبـي كـله عليـك جنـايا

اسمع كلام امك تعال
عبدالرحيم البركل

اسـمـع كــلام امــــك تــــــعــــــال الغربه ماها كنز قروش
والــغـــــــــــــــــــربـه مــــــــاهــــــــــــــــــــا بيوت ومال
الــغـــربــه كـــم ذلــت نـفـوس والـغـربـه كـم هانت رجال
بـوصــيــــك يــــا ولـــدي الـحـنـيـــن اسمع كلام امك تعال

سـمـح الـشـغـل فـي ارض ابــوك ارجـع تـعــــال ما تودرا
ارويــهــا مـن عـرقــــك زلال ارمـيـهــا بـي تـيـراب خدرا
شـــوف الــســنــابـل كـيــــف تـمـيـــل تـشـبـع بلدنا نصدرا
والـغــــربـه تــــب مــا فـيـهــا غير عيشة العذاب والدردرا

مــالـك عـلـي شـغـل الإيـجـار واطاتـنـا بور صبحت وراك
لـيـه تـبـقـي خــدام لـلـغـريــب مـا انـتـي سـيــد نفسك براك
انا عيني في نص الليل ترف وقلبي الحنين نوموا اللي راح
مــن شــوفـتـك غـلـبـني الـمـنام واصـبـح مـناي عيني تراك

ارجـع تـعــال لـي يــا الـحـنـيــن مــالـك عـلـي عيشة الشقي
شـوف كـيــف تـمرنا سبيطوا مال والنيل سقي الوديان سقي
مـا بــتــلـقـي غـيـر رزقـك هنـاك يـا ريت نصيحتي تصدقه
ارجـع تـعــال والـزاد المكتوب لـيـك في ارض ابوك بتلحقه

ارجــع تـــعــــال خــلـي الــــشــــقــي وعــيـشــة الـكــرم في
ارضــك الــمــقــســوم بـيجــيـك في الغربه او هنا لـيـك رب
ســودانــا اصـلــوا مـن الــقـريـر لـيـهو الكريم بالنـيــل وهب
ســودانــا والله الـعـظـيـــم واطــــاتـــوا اغـــلـي مــــن الدهب

سـؤال
صلاح البوح
محمد النصري

أسـع ياتـو فيهـم يا خلـق الله عـاد أو عـاد يـات مصـيـر لى وللولاد
تبدا أمونة رحلة ما كان فى الحساب باراها الزمن شبعا فى العذاب
من يوم سـافر أحمد قاصـد للجنوب باكى أمونة فرقة هزت للقلوب
زوجــهـــا أبـو الـــولاد الـــخــاتى العيوب
مـفـقــود مـن ســـنـــة وأعـــلـــنـــوا للحداد
وتــمـــــر الـــســــنـــة بـــى فــــوق السنة
تــمـــو أربــع ســـنـــيـــن مـــــرت محزنة
فـكــرو فــى الـكـفـيــل وبـــيـــنــاتــن جنا
ومـحــل الأبــــــــــو بــقى عـــــــــم الولاد
عـقـــدولــــو الأهـــل ســـــوو الـــمـــتــبع
مــن مــرت الأخـــــو الفــــــــــات مارجع
تــنــداس الــمـــشــــاعـــر أو قــــول اقتنع
لازم الـنــاس تــضـحـى شـــان لبنى وعماد
ويــتــــم العـقــد بيـنات الدمـوع لا فرحـا كتـيـر لا ضـوّت شموع
عجلات الزمن مابتقبل رجـوع ومابتمشى الحياة زى ماالزول أراد
سـنتـيـن بالكـتـيــر كـان جـابو الولـد والحـزن الـقـبـيل جـواهـم برد
سـمـو عـلــى الــفـــقـــيـــد الــراجل الصمد
شــان حـــفـــظ الإســــم وتــأكــيـــــد للوداد
وما كـان فــى الــحــســـاب الــزمــن العنيد
يـنــســج فى الـخـيــــوط مــن زمـنــــاً بعيد
فـى يـومـاً عــصـيـــب ومــا فـى الـبال أكيد
مــن أول جــــديــــــــد اتـكــــــــــال الرماد
فـى لـحــــظــة ســـكــــون عـمّــــــاها الديار
حــس الـــبـــاب نـــقـــــر قــايـلة أمونة جار
تـاريــهــو الــفــــقــــيــــد كـــان فى الإنتظار
مفقـود الجنوب يرجع تانى صاد كان صدمة قاسية فوق الإحتمال
خلـتـا بـيـن جحـيـم واقع أم خيال إخـتـلّ العـقل وكان آخـر سؤال

أسـع ياتـو فـيهـم يا خلـق الله عـاد أو عاد يات مصير لىّ وللولاد

حــــواء

ضـمـه جـسـم الـلـيـل عويله وضمت الاهات ذليله
حـوا يـانــاس يـاحــلــيـلـه وتــاني يـانــاس ياحليله
مـاسـكـي كـف الـثـوب تخيط والدموع تنزل هميله
كان متاكي الباب وخـايفي من ابوها يشوف حويله
مـاالـعـلـيهو هو ماهو هين كيف تعل روحو العليله
كـان يـقـول لـها حوا مالك والعذاب كيفن مشى لك
حـوا لا تـزيـدي العليكي فوق كتيفي انا شايلو فالك
حـوا مـاهـمـيــني حــالي الا بـس هـامـيــني حـالك
حـوا حـوا بـاقـي نـصـبـر ونـحـبـس العـبره الثقيله
حـوا بـرد الــدنـيـا اكــبـر والله اكــبـر مـن عـتاها
كـان بـامـكـانـه تـسـرق بـس ضـمير الخير حماها
زاد ازاهـا وزاد شـقـاهـا لـمـه ابوها الراجيه ودع
وروحــــــــــــو دقـــــــــــــت بـــــــــــــوغ رحيله
حـوا قـالـت دايـر تـاكـل لـو لـقـت لـهـا لـقـمـه نـيه
قالوا ليها ان دايـري تاكلي اكلي في خاطرك شويه
اضـحـكـيـلـم وابـسـمـيـلـم تـلـقـي بـدل الـقـمـه مـيه
حـوا قـالـت دايـره تـغـمـر لـو حـلـم بالـفرحه طافه
قـالـو لـيـهـا الـدايـري تغـمر الا في صدر السخافه
بـيـنا وبـيـن عـيـشة المعزه ماخلاص بعدت مسافه
حـتـى قـدر الـمـوت اباها مش حرام الموت ياعافا
سـوت الـشـاي لـلـعـطـالـي مـاجـنـت غيـر الرزاله
حــامـت الـحـلات تـغـسـل شـالو نـاس الحـله حاله
مـدت الايـد لـلــعــمــايـه خــتــو فـي ايـديــنـه لالا
قــنـبـت في ضـل مـصـغــر سارحة تلتق في نعالة
في ضـجـيج عجلات زمانه مانست صرخة جماله
حــوا مــاتــت لــمــه مـاتـت امـهــا وكـانـت طفيله
مـاتــت لــمــه ابـــوهـا روحـــو دقــت بـوغ رحيله
ومـاتــت الــف مـره لــمــه سـلـــبـوهـا الـفـضـيـله

بحر السراب
محمد النصرى

يـا فـرحـه فى بـحـر السراب يا كلمة فى اول جواب
يـا واحه فى ليل الصعاب آخر شعاع وسط الضباب
يـا نـجـم مـن دنـيـانـا غـاب يا اغلى ما تحت التراب
تـنـخــلـفـى قـبـال العذاب بيك برسل الآهات خطاب
يـمـه يـا الأمـل الـرحــل قــبـال يـقـول كـلـمـة وداع
يـمـه يـا الـنـور الـخـفـت قـبـال يـرسـل خـيط شعاع
يـمـه يـا دمـعـة فـطـيـــم خـلــوه لـي لـيــــل الضياع
يـمـه يـا مـركـب نـجـاه غـرقــت قـبـل تـفـرد شراع
يـمـه يـا نـجـمـات صـبـاح مـرن سراع مرن سراع
يـا يـمـه مـن بـعـدك انـا اصـبـحـتـا لـلأهـــات وطن
دروشــتـا فـى خـلــوة أســاى ســبـحـتا بخرز المحن
كـتـحـتـا صـبـري انــا لـلــريـاح غنيتا للاحزان بكن
دقـيـتـه بــاب الـذكــريـات كـان الـقى لى هناك سكن
ما لـقـيتا صورتك فى الخيال لا شفتا من بعدك زمن
ودرتــا لـى درب الــرجـــوع كـل الـمــعـــالم اختفن
فـتـشـتـا فـى كـل الـبــلاد كـان الـقـى لـطـيـبـتك مثيل
دورتـا فـى كـل الـبـقـاع شـايـل عــذاب لـيــلاً طويل
زادى الوحيـد كـان الصبر فى الظلمه والزمن العليل
زمـنـا يـشـيـل حــق الـضـعـيـف يـديـهـو لعابر سبيل
زمـنـا يـغـيـر كـل شـئ حـتـى الـزمـان كان مستحيل
يـا يـمـه كيف يتبلا شوق والشوق على كل يوم يزيد
لا انـتـى بـنـتـى ولاهـو راح لا غـيـرو الزمن المديد
يـا يـمـه بــعـــدك لا فـرح طــلانا لا ضــمـــانـا عيد
غير خيط امل يبدا ويروح كل ما العذاب يرجع يعيد
كـل مـا اقـول يـا داك فـرح الـقـاهـو مـنـى بعيد بعيد
لـكـنـى راجـع لـيـك انـا بـالـرغـــم مــن كـل المحال
جـايـك عشان اعرف خطاى من وين تستف للرحال
جـايـك لـو كـان مـسـتـحـيـل جـايـك او كـان بالخيال
راجـيـنى لـو كان فى الحلم ما الدنيا من بعدك زوال
عـنـوانـى خـلـف الـلاوجــود يـا امـى يـا ابـعـد منال

غلطان أنا
خالد شقورى
عبدالرحيم البركل

عـاشـق عـيـونـك كـم سنه معليش خلاص غلطان أنا
مـشـيـت عـلى دربـك سـنـيـن افـرش دريـبـك بـالمنى
سـرحـت فـى واديـك زمـن نـاس الهموم ناس الضنى
كـتـبـت فـيـك احـلـى الـكـلام نـظـمـتـا فيك اجمل غنا
خـلـيـت يـمـيـن كـل الـبـلاد واخـتـرتـا دنـياك احضنا
مـعـلـيـش خـلاص غـلـطـان أنا وكل الحصل بتحملو

انـا لـى زمـن مـتـمـنى يوم آخر المطـاف بس اوصلو
ويـقـولـو لـى مـبـروك عـلـيـك ونـبـدأ الـفرح من أولو
نضحك كتير جنب الصحـاب فى يـوم سعيـد ما اجملو
معليش خـلاص غلطان أنـا غلطـان عشان بغلط كتير

غـلـطـان عشان قايـلـك هـنا إمكن معاى تبدى المسير
غـلـطـان عشان مـن الـنسـيم لو مس لى جسمك اغير
غـلـطـان عشان مـن دون جراح فى دنيتك داير اطير
ماكـان زمـان بـتـقـولى لى غيرك محال اعشق حبيب
مـهـمـا قـسـت كـل الـظـروف أنا ليك ما ممكن اسيب
آيـه الـجـديـد فـى حـبـنـا آيـه الـحـصـل آيـه الـغـريب
لـو مـا الـزمـان غير هواك ولقيتى لى جرحك طبيب
قولى زى ما النـاس تقـول انو الزواج قسمه ونصيب
معـلـيـش خلاص غلطان أنا ومن قلبى ليك كل المنى

تـتـهـنـى بـى فـرح الـعـمـر ويــذدان قـليـبــك بـالمـنى
ياهـو الـقـدر وانا راضى حتى لـو انكـتب لـى الضنى
تـتـهـنـى انـت مـع الـنصـيـب وانا ليك بنظـم فى الغنا
اصلوا الـحـصـل ما منـك انتى بس صحيح غلطان أنا

يايابة
علاء الدين عبد الرحيم - أرقي "تحت التلحين"

اتصل الشاعر على والده بالشماليه فقال له الوالد معاتباً لماذا يا علاء لم تكتب في كما كتبت في أمك .. ففاضت دموع الشاعر وكتب:

عشانك يابا سبت بلادي واتغرب
واتحمّل مآسي الغربه شان يايابا ما تتعب
قلت اشيل معاك الهمّ اقاسمك في التعب واتعب
وعشانك يابا لو ترتاح أقاسي واعاني واتعذب
لا تشيل ليّ همّ يايابا عارفو قليبك أنت كعب ..
سعيد أنا في العذاب البي ما دام الفرج قرب
مهما شقيت أنا وعانيت واتحملت هول وصعب
مقابل بسمه منك يابا ارتاح وانبسط واطرب
منو الزرع الفضايل فينا لي أخلاقنا مين هذب
منو الورانا قيّم الريد ويوم ما شال عصاتو ضرب
منو الفرّش دروبنا ورود ولي كل البعيد قرب
منو الفهمنا معنى الجود ويوم ما ردّ لينا طلب
غلبني أرد جمايلك لي ولمه خلاص غلبت كتب
قصيده توضح المكنون عساها تكون شويه أنسب
كيفن أحل ديون مردومه منك فوقي بالأردب ...
صعب صنع الجميل لكين لقيت حفظ الجميل أصعب
وجودك بينا نعمه وخير مدفق والله لينا وهب
كلما تعفو خيري يزيد وكل ما ترضى افوز واكسب
عفوك يايابا ري عطشان عفوك أنا منو داير اشرب
عفوك يا يابا كل ما يزيد برضي أنا في الزياده ارغب
عفوك لي زي صباح العيد برجا هلالو واترغب
عفوك مطر الدرت يروينا يشبع للقليب الصب
عفوك يا يابا دفقة خير تخدر في نفوسنا جدب
معين ريدك عيون توتيل لا بيجف ولا بينضب
انداح طفّا نار البين وفوق جمر اغترابنا سكب
رضاك في الدنيا نور وسرور وراحة بال غنا ومكسب
مفتاح لي دخول الجنه مغلاق لي سعير ولهب
شوق وتحيه ليك يا بوي قدر ما الهمبريب هبهب
قدر ما اينعت أشجار وشالت موز وتين وعنب
قدر ما شال نخيلنا سبيط وهدّل بي جريدو رطب
قدر نجم السما الضوّاي قدر ما يسطع الكوكب
قدر ما موجه طالت قيف قدر ما نيلنا فاض تسب
قدر ما اسبّح الخالق قدر ما اترددت يا رب

للشوايقه باع طويل فى غناء الطنبور لا ينافسهم فيها أحد

تعذبـنـى وتهـيَّـج نــارى .. قـولـة مــاك مـواصـل
إنتى ما عارفة السبـب مـن أهلـك الباقيـن عـوازل
كاسو فراقنا وبس دايرنى .. أحيا غريـب وهامـل
وأنا أرحم لىْ فـراق الدنيـا .. مـن عينيهـو ساهل

سلام يازولة في جواي تحوم بين القلـب والـروح
تسد باب الفرح تالاى وتفتح كل مشاعـري جـروح
***
كمل صبر الليالي معاى خريف أحزاني برقو يلـوح
غمر مطر الهيام جواي جراحا ت الولـه والنـوح
أنا الودر معاكى صباي امل مابيـن ايديـك مذبـوح
تسوقك غربة من دنياي تسوقني عليك غربـة روح
ولا بي أيدي احبسوا هواى دا حال العاشق المجروح
***
مشتاق ليكى وأنتي معاى زمن ساكناني في الأعماق
بعد ساقك قدر لسواي وقف بينـا النصيـب فـراق
تصوري حالي بعدك كيف مسكون الهيـام مشتـاق
حزني الابت تعقبو أفراح ليلى رفض يبينلو إشـراق
احوق صبري في الأيام وصبر أيوب على ما حـاق
***
بكاك قلبي الصبح مكلـوم يتيـم الريـدة والأحـلام
بكا الزول الرجاك عمر موهدب لا صحـا ولا نـام
كشحتى أماني عز الريح رميتي على رمادا حطـام
قدري هواك سقيتو دماي وازهر بين ضلوعي وقـام
نطردو الآهة من جواي ويدخل بي مسامـي سهـام
***
أرسلك رسا يل الشوق وروايع الحب على الإطلاق
ترسلي في خيالك ليل يهب نـار وجـدك الحـراق
لا مليت عذابك لي ولا الشـوق اتعبـوا الساسـاق
غناي عليك لو عار فاهو ينزف مـن جـرح دفـاق
أريتو غنايا بـي ذكـراك يخفـف لوعـة العشـاق
***
ماك محتاجة أحكي ليك أنتي فؤادي ليـك ومعـاك
توسدي في ضفايرك ليل تنومي وحالو مـا همـاك
تكتبي على وريدو اسمك تنحتي صورة لي لذكـراك
قدري معاك بحبك موت ومكتوب إنـي مـا ألقـاك
***
كثير لاموني في حبك شلت دموع ملامـى بـراى
كثير صدوني من دربك لقوها أشواقي سابقة خطاي
بوحي بسر عذابي معاك عليك صدق الهوى الجواك
قوليلن صبح مجذوب ولا على كيفو ينسـى هـواى
مبارى دريبى ذي مجنون مشـدوه لا قلـب لا رأى

حدثتنى.. سحابة عنك
و كلمتنى قالت انك..
الصباحات أخذه لونك
و الظلال الوارفة حنك
النسايم حدثتنى..عن رذاذك فى الاماسى..
عن عيون للروعة مرتع..و للهوى المجنون مراسى
عن مصيرى .. اذا رأيتك بعيون قلبى و حواسى..
خوفتنى النسمة منك..و رغبتنى..
و تانى.. عادت..
بى عبيرك .. عذبتنى!!
من حديث النسمة عنك..ظنى قال انك خرافة..
الا لمن شفت حسنك..و طبعك المنه اللطافة..
قلت يا ستار عليا !!
من عيون ساحرة و بهية..
من جمال..اخاذ و فاتن..من ورود زاهية و ندية..
مافاى زول فى الدنيا شافك..الا طاف فيك حب و نجوى..
و ما قدر يمسح ملامحك..او يجد لعذابه سلوى..
انت في عينيك قصائد.. واليفيض انغام و نشوى..
فيها رقة..و لين و قسوة !!
و سلطة ليها نفوذ و سطوة..
دوختنى بنظرة حلوة..
أجبرتنى..أقول بريدها..و أنسى كيف الشوق بيروى!!
حدثتنى.. سحابة عنك
و كلمتنى قالت انك..
الصباحات اخذه لونك
و الظلاال الوارفة.. حنك

بدر مدر يا رواسي نحن بعاد لحقنا القيفة
انت مدبج ونحن نقاسى فى برد امشير والموج والزيفة
مركبك الماليها مطارق تمشي تقيف تسرح بى كيفه
مرة مغارب ومرة مشارق وانت تخاف الريح وحفيفه
ساوها زينة وفوقها بيارق وانت مدبج توب وقطيفة
فيها المات والضاربه الفالق والسلمين فى حالة مخيفة
كل الناس ترزح في كفة وانت وناسك فوق الدفة
الدايشين والراسهم لفة والشاخصين فى المدى للضفة
صوف افضالك فوقهم جوة فوق الموية وريقهم جفة
من العطش النص اتوفى وباقى النص الفضل جيفة
....
ضاقوا المر والحال استعصى الشغال واللاحق الحصة
الواصال للرحم اتقصة والهداي مو لاقى الفرصة
الرساي سافر ما وصى خلى محمد واحمد وحفصة
الاطفال العرفو القصة سدت جوة حلوقهم غصة
من الجوع الدم اتمصة واصبح كل الحلم رغيفة
.....
كل الراكب شاف احلامه دون احساس ماتت قدامه
فنُ كتابه وكسر اقلامه لا الوالدين لا جار ما لامه
ناس الحلة القعدوا وقاموا اصر والح يمشى كلامه
هزموهو اخوانه البى الجوع نامو وكم خريج ما لاقى وظيفة
.......
يا الفكيتها وقلت لها سيرى وعارف انه الدنيا دميرى
لا فى ضفاف لا شفنا جزيرى لا فى الحيرى ولا في الطيرى
كسرت جناحها وقلت لها طيرى اتملكت الكانت ميرى
يا السودت الناصع وجيرى ايد الحق صابونى وليفة
......
قبلك كم متعلم وقاري عكس الريح فكولو الصارى
مشدوهين متعشى وحارى ريسها شلته والبحارى
كم سنوات علام البارى واقفى وهم شايفنها جارى
بقينا هلاك والقيف متضارى لا حجار لا دوحة وريفة
.....
حسك عينك ما تتمادى وتنسى الراكب عنده ارادة
الاهوال الشافها وخاضها كان فى مدرسة والا عيادة
شفنا الايد الكان اجوادة يا مبتورة يا شحادة
وياما رقاب كانت سدادة علمت الله من التعريفة
......
يا ريسنا قدر مديرك فك الدفة وادها غيرك
احفظ نفسك ترضى ضميرك وقف اوع تواصل سيرك
كان طاوعتنى شن بيضيرك عرض اكتافك وفك البيرك
لا هنى شكرا وكتر خيرك وكل انسان في الارض خليفة

من يوم البحر الجانا وتسب وقام
يوم دخل الحلة وهدم بيوتنا ترا وهدام
صبحنا ضيوف ما خلاّ وراهو صلة أرحام
يوم داكا عوض خلاها مرق سفره طويل مع الأيام
ثم يسترسل في أوصاف عوض
درويشاً صغير عشرة أعوام
الزول زول الله من الصلاح الرفعت عنهم الأقلام
من غرث الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
ثم يبدا في وصف ملابس عوض وما كان زاده يوم خروجه
متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل
غتاهو بقالو مظلة جلوس وقيام
يا ساري الليل أين ذهب عوض هل غرق في جوف الليل
أم رحل في رحلة تصوف
يبقالي نجع متوجه قاصد أرض الشام
ما شفتو هناك مع الحجاج لابس الإحرام
بين يثرب ومكة وفي بيت الله المكسي رخام
يبقالي هناك يكون مندسي مع الخدام
يا ساري أبل جهدك نحنا فتشنا في كل محل ما خلينا بكان
فتشنا سما أرض ما شفنا منام
في التمر الشايل تكا سبيطو مدلول خام
في الجرف الأخضر في لوبيهو وفي النجام
في جدول جاري تسرسر مويتو نعيماً دام
ومع ذلك لم نجده وقد طال الغياب
ولن نيأس فالحلة في الانتظار فاينما وجدته بلغه السلام
يا ساري الليل أنا داير أوصيك وأديك كلام
الروح إين صعدت لي باريها وفي جنات الخلد مقام
لو لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام..

مهما هربنا من واقعنا..خلاص صبح الزمن مقلوب
دة الماذينا والموجعنا..وبقينا نسوي فى الحي اوب
كل ما نقول عدلنا وضعنا..نلقاهو الوضع مخروب
للموضات ترانا تبعنا..أدمنا وغلبنا نتوب
لما الهم مسك شارعنا..وكلنا قلنا فيهو الروب
اليوم الشباب في محنة..بين البدعة والمرغوب
قالو ثقافة بتفتحنا..وتتقلب الثقافة ذنوب
إرث اجدادنا ياهو سمحنا..تقاليد دينا هى الاسلوب
اسع منهن وين نحنة..حسينا الفقد يادوب
وما عارفين محل صالحنا..لا راكبين ولانا اقروب
وين ابواتنا اهل الحارة..اهل العمى والمركوب
والعراقى دمورية...وجاري وراهو سربادوب
ديل ربونا بالطورية..والعرق الدوام مصبوب
ترباة الاسر دينية..رزقا بالحلال مجلوب
حليل اماتنا امات طرقى..الفردى ولباس التوب
نار الدوكى والمشاطة..والواقود ورود الموية ليهو دروب
حش القش تحت فى الساقى..رفع الجدول المخروب
زمن المحفضة المندلى..واصل سيرة للعرقوب
حل علينا زمن كلو..ضيق ولبس مكروب
الولد والبت فد خلقى..وكل زول عن رفيقو ينوب